X’inhuma l-operazzjonijiet immirati ta’ rifinanzjament għal żmien itwal (TLTROs)?
30 ta’ Marzu 2021 (aġġornata fit-13 ta’ Settembru 2024)
L-operazzjonijiet immirati ta' rifinanzjament fuq żmien itwal (TLTROs) jintużaw mill-BĊE biex joffri self fuq żmien itwal lill-banek b’kostijiet favorevoli. Dan jappoġġa lill-banek fis-self lid-ditti u lill-unitajiet domestiċi, u jiżgura li l-politika monetarja tagħna tilħaq lin-nies fiż-żona tal-euro kollha.
Kif jaħdem dan? It-TLTROs huma differenti mill-operazzjonijiet tas-suq miftuħ regolari tagħna bi tliet modi distinti:
- It-TLTROs huma mmirati b’mod speċifiku – kif jgħid l-isem – sabiex iżommu jew iżidu s-self tal-banek lin-negozji u lill-konsumaturi.
- It-TLTROs huma kundizzjonali. Il-banek jiksbu kreditu rħis biss mill-BĊE jekk fil-fatt jgħaddu l-flus lill-poplu u lin-negozji fil-forma ta’ self. L-ammont massimu offrut huwa limitat għal sehem mis-self tal-banek lil kumpaniji u lil unitajiet domestiċi (minbarra s-self għax-xiri ta’ djar). Aktar ma bank ikun ta f’self lil kumpaniji u lil unitajiet domestiċi qabel il-bidu tal-operazzjonijiet, aktar ikun jista’ jissellef taħt it-TLTROs.
- It-TLTROs joffru self aktar fit-tul. Għandhom jitħallsu lura biss wara 4 snin, ħafna itwal mill-istrumenti standard tal-BĊE li jipprovdu likwidità. Dan jipprovdi lill-banek b’finanzjament stabbli u affidabbli.
Għaliex noffru t-TLTROs?
It-TLTROs jgħinu biex inżommu l-ekonomija għaddejja u jiżguraw li d-ditti u l-familji jkomplu jiksbu l-fondi li jeħtieġu biex jibqgħu għaddejjin u jinvestu. It-TLTROs huma wieħed mill-istrumenti ewlenin għall-BĊE biex jippreserva kondizzjonijiet favorevoli ta’ finanzjament meta jkun meħtieġ. Huma jipprovdu lill-banek b’ċertezza ta’ finanzjament b’kost favorevoli hekk kif jappoġġaw is-self lill-kumpaniji u lill-unitajiet domestiċi. It-TLTROs jinkoraġġixxu s-self meta l-banek ikunu aktar eżitanti biex isellfu.
Billi jinkoraġġixxu s-self mill-banek, it-TLTROs jiżguraw li l-ekonomija tibbenefika mill-politika monetarja tagħna. Is-self lill-kumpaniji u lill-unitajiet domestiċi jiffinanzja l-investiment u jappoġġa l-infiq fuq oġġetti u servizzi, speċjalment meta l-ekonomija tkun qed tiffaċċja diffikultajiet kbar.
Il-BĊE nieda tliet serje ta’ TLTROs: TLTRO I fl-2014, TLTRO II fl-2016 u TLTRO III fl-2019.
It-TLTRO III kellhom rwol importanti biex tiġi missielta l-kriżi tal-koronavirus
It-TLTRO III kienu waħda mill-miżuri ewlenin tagħna biex niġġieldu l-impatt tal-kriżi tal-koronavirus fuq l-ekonomija. Il-banek jistgħu jisselfu fondi mill-BĊE b’rata favorevoli baxxa daqs -1 %. Dan ifisser li dawn il-fondi ġew offruti b'0.5 punti perċentwali taħt ir-rata tal-faċilità tad-depożitu tal-BĊE. Il-banek ġew ippremjati b’din ir-rata ta’ imgħax aktar baxxa jekk baqgħu jsellfu lid-ditti u lill-unitajiet domestiċi. Offrejna lill-banek dawn it-termini aktar attraenti mill-24 ta’ Ġunju 2020 sat-23 ta’ Ġunju 2022.
Dan ħeġġeġ lill-banek biex isellfu aktar u jgħaddu dawn it-termini attraenti lid-ditti u lill-unitajiet domestiċi biex jgħinuhom jiġġieldu aħjar il-kriżi tal-koronavirus. It-tielet programm tat-TLTRO kkonsista f’għaxar operazzjonijiet, kull waħda b’maturità ta’ 3 snin (li qabel kienu TLTROs li kellhom maturità sa 4 snin). Dan ifisser li l-banek għandhom 3 snin biex iħallsu lura dak li ssellfu. L-operazzjonijiet ta’ TLTRO III bdew f’Settembru 2019, qabel ma l-kriżi tal-koronavirus laqtet l-ekonomija. Imbagħad, il-programm ġie adattat biex jirrispondi għall-impatt tal-kriżi f’Marzu, f’April u darb’oħra f’Diċembru 2020. L-aħħar operazzjoni twettqet f’Diċembru 2021.