Glacann an Bhulgáir leis an euro

01 Eanáir 2026

• Cuirtear nótaí bainc agus boinn euro i gcúrsaíocht sa Bhulgáir
• Tagann Banc Náisiúnta na Bulgáire isteach sa Eurochóras
• Is í an Bhulgáir an 21ú ball den limistéar euro
• Is comhalta iomlán den Sásra Maoirseachta Aonair anois é Banc Náisiúnta na Bulgáire tar éis thréimhse an dlúthchomhair

Tháinig an euro i gcúrsaíocht go hoifigiúil sa Bhulgáir inniu, rud a fhágann go bhfuil 21 Bhallstát an Aontais (AE) ag úsáid airgeadra aonair na hEorpa. Leanann seo an cinneadh foirmiúil a rinneadh i mí Iúil, inár fógraíodh freisin ráta comhshó oifigiúil lev na Bulgáire de 1.95583 in aghaidh an euro.

“Cuirim fáilte Uí Cheallaigh roimh an mBulgáir go dtí teaghlach an euro agus roimh Gobharnóir Radev go dtí bord Chomhairle Rialaithe an Bhainc Ceannais Eorpaigh in Frankfurt” a dúirt Christine Lagarde, Uachtarán BCE. “Is siombail chumhachtach é an euro d’Eoraip agus céard is féidir linn a bhaint amach nuair a n-oibrímid le chéile, agus do na luachanna comhroinnte agus neart comhchoiteann is féidir linn a úsáid chun aghaidh a thabhairt ar an éiginnteacht gheopholaitiúil dhomhanda atá romhainn faoi láthair.”

Rinne BCE cloch mhíle stairiúil ghlacadh an Bhulgáir leis an euro a chomóradh trí shoilse a chur ar an bpríomhfhoirgneamh in Frankfurt, siombail atá ann do chomhtháthú agus d’aontacht 358 milliúin daoine san Eoraip a bhaineann úsáid as an euro.

Agus an Bhulgáir anois mar pháirt den limistéar euro, is páirt anois den Eurochóras é Българска народна банка (Banc Náisiúnta na Bulgáire), banc ceannais náisiúnta na tíre, agus glacfaidh Gobharnóir Bhanc Ceannais na Bulgáire páirt ar Chomhairle Rialaithe BCE.

Is comhalta iomlán den Sásra Maoirseachta Aonair anois é Banc Náisiúnta na Bulgáire, cé go raibh an tír páirteach i gcreat an dlúthchomhair ó mhí Dheireadh Fómhair 2020. Mar sin, tá BCE anois freagrach as maoirseacht dhíreach a dhéanamh ar cheithre institiúid shuntasach sa tír agus as formhaoirseacht a dhéanamh ar 17 institiúid creidmheasa ar lú a suntas. Mar chuid dá chúraimí maoirseachta, tá BCE anois freagrach as bainc a cheadúnú agus ceannaitheoirí shealúchais cháilitheacha a mheasúnú i ngach banc. Tá ionadaí ag Banc Náisiúnta na Bulgáire ar Bhord Maoirseachta BCE.

D’íoc Banc Náisiúnta na Bulgáire an chuid eile dá ranníocaíocht le caipiteal BCE agus d’aistrigh sí a ranníocaíocht go dtí sócmhainní cúlchiste eachtracha BCE. Beidh contrapháirtí na Bulgáire don Eurochóras in ann pháirt a ghlacadh in oibríochtaí margaidh oscailte BCE a fhógrófar tar éis an 1 Eanáir 2026. Foilseofar liosta d’institiúidí creidmheasa agus brainsí institiúidí creidmheasa lonnaithe sa Bhulgáir agus atá faoi réir riachtanas cúlchiste in am trátha ar shúiomh gréasáin BCE, mar aon le liostaí de bhrainsí institiúidí creidmheasa na Bulgáire atá lonnaithe i mBallstáit eile an Aontais a úsáideann an euro cheana. D’fhógair BCE forálacha idirthréimhseacha le haghaidh ceanglais íosta cúlchiste an 13 Deireadh Fómhair 2025. Cuirfear sócmhainní lonnaithe sa Bhulgáir agus a gcomhlíonann na ceanglais is gá le liosta an limistéir euro de chomhthaobhacht incháilithe.

As seo amach, glacfaidh margaí na Bulgáire páirt i seirbhísí TARGET an Eurochórais lena n-áirithítear saorshreabhadh airgid thirim, urrús agus comhthaobhachta ar fud na hEorpa. Is seo a leanas na seirbhísí;T2 (chun íocaíochtaí a shocrú), T2S (chun urrúis a shocrú), TIPS (chun íocaíochtaí meandracha a shocrú) agus ECMS (chun bainistiú comhthaobhachta in oibríochtaí creidmheasa an Eurochórais). Bhí margadh na Bulgáire in ann socraíochtaí in euro in T2S agus TIPS a dhéanamh ó 2023 agus 2024, faoi seach. Chuaigh aistriú chontrapháirtithe na Bulgáire go réidh, agus tá gach seirbhís gníomhach anois.

As seo amach, tagann córas nua rothlaithe ceart vótála i bhfeidhm i gComhairle Rialaithe BCE, mar a léirítear i bhféilire anseo.

Is féidir leis na meáin a gcuid ceisteanna a sheoladh chuig Benoit Deeg, teil: +49 172 168 3704.