KONFERENZA STAMPA

Christine Lagarde, President tal-BĊE,
Luis de Guindos, Viċi President tal-BĊE

Frankfurt am Main, 12 ta’ Settembru 2024

Il-wara nofsinhar it-tajjeb, il-Viċi President u jien nilqgħukom għal din il-konferenza stampa.

Il-Kunsill Governattiv illum iddeċieda li jnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – b’25 punt bażi. Abbażi tal-valutazzjoni aġġornata tagħna tal-prospetti dwar l-inflazzjoni, id-dinamika tal-inflazzjoni sottostanti u l-qawwa tat-trażmissjoni tal-politika monetarja, issa huwa xieraq li jittieħed pass ieħor biex jiġi mmoderat il-grad tar-restrizzjoni tal-politika monetarja.

Id-data reċenti li daħlet dwar l-inflazzjoni kienet ġeneralment kif mistenni, u l-aħħar proġettazzjonijiet tal-persunal tal-BĊE jikkonfermaw il-perspettiva tal-inflazzjoni preċedenti. Il-persunal jara inflazzjoni globali medja ta’ 2.5 fil-mija fl-2024, 2.2 fil-mija fl-2025 u 1.9 fil-mija fl-2026, bħal fil-proġettazzjonijiet ta’ Ġunju. L-inflazzjoni hija mistennija li terġa’ togħla fl-aħħar parti ta’ din is-sena, parzjalment għaliex it-tnaqqis qawwi preċedenti fil-prezzijiet tal-enerġija se jaqa’ mir-rati annwali. L-inflazzjoni mbagħad għandha tonqos lejn il-mira tagħna matul it-tieni nofs tas-sena d-dieħla. Għall-inflazzjoni prinċipali, il-proġettazzjonijiet għall-2024 u l-2025 ġew riveduti kemmxejn ’il fuq, peress li l-inflazzjoni fis-servizzi kienet ogħla milli mistenni. Fl-istess ħin, il-persunal ikompli jistenna tnaqqis rapidu fl-inflazzjoni prinċipali, minn 2.9% din is-sena għal 2.3% fl-2025 u 2.0% fl-2026.

L-inflazzjoni domestika tibqa’ għolja hekk kif il-pagi għadhom jogħlew b’ritmu elevat. Madankollu, il-pressjonijiet tal-kost lavorattiv qegħdin jimmoderaw, u l-profitti qegħdin itaffu l-impatt tal-pagi ogħla fuq l-inflazzjoni. Il-kundizzjonijiet tal-finanzjament jibqgħu restrittivi, u l-attività ekonomika għadha kajmana, li tirrifletti konsum privat u investiment dgħajfin. Il-persunal jipproġetta li l-ekonomija se tikber b’0.8% fl-2024, u tiżdied għal 1.3% fl-2025 u 1.5% fl-2026. Din hija reviżjoni ’l isfel ħafifa meta mqabbla mal-proġettazzjonijiet ta’ Ġunju, l-aktar minħabba kontribut aktar dgħajjef mid-domanda domestika fil-ftit trimestri li ġejjin.

Aħna ddeterminati li niżguraw li l-inflazzjoni terġa’ lura għall-mira tagħna fi żmien medju ta’ tnejn fil-mija, b’mod f’waqtu. Se nżommu r-rati tal-politika restrittivi biżżejjed għal kemm ikun meħtieġ sabiex tinkiseb din il-mira. Se nkomplu nsegwu approċċ dipendenti mid-data u fuq bażi ta’ laqgħa b’laqgħa sabiex niddeterminaw il-livell xieraq u t-tul taż-żmien tat-restrizzjoni. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospetti tal-inflazzjoni fid-dawl tad-data ekonomika u finanzjarja li ġejja, id-dinamika tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nintrabtu minn qabel dwar xi trajettorja partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna. Kif tħabbar fit-13 ta’ Marzu 2024, xi bidliet għall-qafas operazzjonali għall-implimentazzjoni tal-politika monetarja se jidħlu fis-seħħ mit-18 ta’ Settembru. B’mod partikolari, il-firxa bejn ir-rata tal-imgħax fuq l-operazzjonijiet ta’ rifinanzjament ewlenin u r-rata tal-faċilità tad-depożitu se tiġi stabbilita għal 15-il punt bażi. Il-firxa bejn ir-rata fuq il-faċilità tas-self marġinali u r-rata fuq l-operazzjonijiet ewlenin ta’ rifinanzjament se jibqgħu l-istess b’25 punt bażi.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

L-ekonomija kibret b’0.2 fil-mija fit-tieni trimestru, wara 0.3 fil-mija fl-ewwel trimestru, biex b'hekk ma laħqitx il-proġettazzjonijiet tal-persunal. It-tkabbir ġie l-aktar mill-esportazzjonijiet netti u l-infiq mill-gvernijiet. Id-domanda domestika privata ddgħajfet, hekk kif l-unitajiet domestiċi kkunsmaw inqas, id-ditti qatgħu l-investiment fuq in-negozju u l-investiment fid-djar naqas. Filwaqt li s-servizzi appoġġaw it-tkabbir, l-industrija u l-kostruzzjoni kkontribwew b’mod negattiv. Skont l-indikaturi tal-istħarriġ, l-irkupru qed ikompli jiffaċċja xi xkiel.

Nistennew li l-irkupru jissaħħaħ maż-żmien, hekk kif id-dħul reali jippermetti lill-unitajiet domestiċi biex jikkunsmaw aktar. L-effetti li qegħdin ibattu gradwalment tal-politika monetarja restrittiva għandhom jappoġġaw il-konsum u l-investiment. L-esportazzjonijiet għandhom ikomplu jikkontribwixxu wkoll għall-irkupru hekk kif id-domanda globali tiżdied.

Is-suq tax-xogħol jibqa’ reżiljenti. Ir-rata tal-qgħad baqgħet ġeneralment l-istess f’Lulju, bir-rata ta’ 6.4 fil-mija. Fl-istess ħin, iż-żieda fil-qgħad naqset għal 0.2 fil-mija fit-tieni trimestru, minn 0.3 fil-mija fl-ewwel trimestru. L-indikaturi minn stħarriġ reċenti jippuntaw lejn moderazzjoni ulterjuri fid-domanda għall-manodopera, u r-rata tal-postijiet tax-xogħol battala waqgħet aktar qrib għal-livelli ta’ qabel il-pandemija.

Il-politiki nazzjonali fiskali u strutturali għandhom ikunu mmirati lejn li jagħmlu l-ekonomija aktar produttiva u kompetittiva, u dan għandu jgħin biex jitnaqqsu l-pressjonijiet fuq il-prezzijiet fuq żmien medju. Ir-rapport ta’ Mario Draghi fuq il-futur tal-kompetittività Ewropea u r-rapport ta’ Enrico Letta dwar it-tisħiħ tas-Suq Uniku jisħqu dwar il-ħtieġa urġenti għal riforma u jipprovdu proposti konkreti biex dan iseħħ. L-implimentazzjoni tal-qafas ta’ governanza ekonomika rivedut tal-UE b’mod sħiħ, b’mod trasparenti u mingħajr dewmien se tgħin lill-gvernijiet inaqqsu d-defiċits baġitarji u l-proporzjonijiet tad-dejn fuq bażi sostnuta. Il-gvernijiet issa għandhom jagħtu bidu b’saħħtu f’din id-direzzjoni fil-pjanijiet tagħhom fuq żmien medju għall-politiki fiskali u strutturali.

Inflazzjoni

Skont l-istima preliminari tal-Eurostat, l-inflazzjoni annwali naqset għal 2.2 fil-mija f’Awwissu, minn 2.6 fil-mija f’Lulju. Il-prezzijiet tal-enerġija naqsu b’rata annwali ta’ 3.0 fil-mija, wara żieda ta’ 1.2 fil-mija fix-xahar ta’ qabel. L-inflazzjoni fil-prezzijiet tal-ikel żdiedet bi ftit għal 2.4 fil-mija f’Awwissu. L-inflazzjoni tal-prodotti u l-inflazzjoni tas-servizzi mxew f’direzzjonijiet opposti. L-inflazzjoni tal-prodotti naqset għal 0.4 fil-mija, minn 0.7 fil-mija f’Lulju filwaqt li l-inflazzjoni tas-servizzi żdiedet, għal 4.2 fil-mija minn 4.0 fil-mija.

Il-biċċa l-kbira tal-miżuri tal-inflazzjoni sottostanti baqgħu ġeneralment l-istess f’Lulju. L-inflazzjoni domestika naqset kemmxejn, għal 4.4 fil-mija minn 4.5 fil-mija f’Ġunju, bi pressjonijiet b’saħħithom fuq il-prezzijiet li ġew speċjalment mill-pagi. It-tkabbir negozjat tal-pagi se jibqa’ għoli u volatili matul il-kumplament tas-sena, minħabba r-rwol sinifikanti tal-ħlasijiet ta’ darba f’xi pajjiżi u n-natura tal-aġġustamenti tal-pagi li jsiru f’fażijiet. Fl-istess ħin, it-tkabbir ġenerali fl-ispejjeż tax-xogħol qiegħed jimmodera. It-tkabbir fil-kumpens għal kull impjegat kompla jaqa’ għal 4.3 fil-mija fit-tieni trimestru, ir-raba’ tnaqqis konsekuttiv, u l-persunal tal-BĊE jipproġetta li se jerġa’ jnaqqas fir-ritmu notevolment is-sena d-dieħla. Minkejja l-produttività dgħajfa, l-ispejjeż għal kull unità tax-xogħol żdiedu b’ammont aktar dgħajjef fit-tieni trimestru, b’4.6 fil-mija, wara 5.2 fil-mija fl-ewwel trimestru. Il-persunal jistennew li ż-żieda fl-ispejjeż għal kull unità tax-xogħol se jkomplu jonqsu fuq l-orizzont tal-proġettazzjoni minħabba ż-żieda aktar baxxa fil-pagi u rkupru fil-produttività. Finalment, il-profitti qed ikomplu jpaċu parzjalment l-effetti inflazzjonarji tal-ispejjeż tax-xogħol ogħla.

Il-proċess ta’ diżinflazzjoni għandhom jiġu appoġġati minħabba li l-pressjonijiet tal-ispiża tax-xogħol qegħdin ibattu u li l-issikkar fil-passat tal-politika monetarja qiegħed gradwalment jaffettwa l-prezzijiet tal-konsumaturi. Il-biċċa l-kbira tal-miżuri tal-aspettattivi tal-inflazzjoni fuq perjodu itwal huma ta’ madwar 2 fil-mija, u l-miżuri bbażati fuq is-suq waqgħu eqreb lejn dak il-livell sa mil-laqgħa tagħna f’Lulju.

Valutazzjoni tar-riskji

Ir-riskji għat-tkabbir ekonomiku jibqgħu mxaqilba lejn it-tnaqqis. Id-domanda aktar baxxa għall-esportazzjonijiet fiż-żona tal-euro, minħabba pereżempju ekonomija dinjija aktar dgħajfa jew eskalazzjoni fit-tensjonijiet dinjin bejn l-ekonomiji ewlenin, ikun ta’ piż fuq it-tkabbir taż-żona tal-euro. Il-gwerra mhux ġustifikata tar-Russja kontra l-Ukrajna u l-kunflitt traġiku fil-Lvant Nofsani huma sorsi ewlenin ta’ riskju ġeopolitiku. Dan jista’ jwassal biex id-ditti u l-unitajiet domestiċi jsiru inqas kunfidenti dwar il-futur u li jiġi mfixkel il-kummerċ globali. It-tkabbir jista’ jkun ukoll aktar baxx jekk l-effetti mdewma tal-issikkar tal-politika monetarja jirriżultaw li huma aktar b’saħħithom milli mistenni. It-tkabbir jista’ jkun ogħla jekk l-inflazzjoni tonqos aktar malajr milli mistenni u ż-żieda fil-kunfidenza u d-dħul reali tkun tfisser li l-infiq jiżdied b’aktar milli huwa antiċipat, jew jekk l-ekonomija dinjija tikber b’mod aktar b’saħħtu milli mistenni.

L-inflazzjoni tista’ tkun ogħla milli mistenni jekk il-pagi jew il-profitti jiżdiedu b’aktar milli huwa mistenni. Ir-riskji ta’ żieda fl-inflazzjoni jirriżultaw ukoll mit-tensjonijiet ġeopolitiċi li qegħdin jiżdiedu, li jistgħu jgħollu l-prezzijiet tal-enerġija u l-ispejjeż tal-merkanzija fuq perjodu fil-qrib u jfixklu l-kummerċ globali. Barra minn hekk, l-avvenimenti ta’ temp estrem, u l-kriżi tal-klima li qiegħda tiżvolġi b’mod aktar ġenerali, jistgħu jgħollu l-prezzijiet tal-ikel. B’kuntrast, l-inflazzjoni tista’ tkun anqas milli mistenni jekk il-politika monetarja trażżan id-domanda aktar milli mistenni, jew jekk l-ambjent ekonomiku fil-bqija tad-dinja jmur għall-agħar b’mod mhux mistenni.

Kundizzjonijiet finanzjarji u monetarji

Ir-rati tal-imgħax tas-suq naqsu notevolment sa mil-laqgħa tagħna f’Lulju, l-aktar minħabba perspettiva aktar dgħajfa għat-tkabbir globali u tħassib imnaqqas dwar il-pressjonijiet tal-inflazzjoni. It-tensjonijiet fis-swieq globali matul is-sajf wasslu għall-issikkar temporanju tal-kundizzjonijiet finanzjarji fis-segmenti tas-suq aktar riskjużi.

B’mod ġenerali, l-ispejjeż ta’ finanzjament jibqgħu restrittivi peress li ż-żidiet preċedenti tagħna fir-rata uffiċjali jkomplu jinfiltraw fil-katina ta’ trażmissjoni. Ir-rati tal-imgħax medji fuq self ġdid lill-kumpaniji u fuq self domestiku ġdid baqgħu għoljin f’Lulju bir-rati ta’ 5.1 fil-mija u 3.8 fil-mija rispettivament.

It-tkabbir fil-kreditu jibqa’ batut minħabba domanda dgħajfa. Is-self mill-banek lid-ditti kiber b’rata annwali ta’ 0.6 fil-mija f’Lulju, tnaqqis żgħir minn Ġunju, u t-tkabbir fis-self lill-unitajiet domestiċi żdied ftit għal 0.5 fil-mija. L-aggregat monetarju wiesa’ – kif iimkejjel minn M3 – żdied bi 2.3 fil-mija f’Lulju, l-istess rata bħal f’Ġunju.

Konklużjoni

Il-Kunsill Governattiv illum iddeċieda li jnaqqas ir-rata tal-faċilità tad-depożitu b’25 punt bażi. Aħna ddeterminati li niżguraw li l-inflazzjoni terġa’ lura għall-mira tagħna fi żmien medju ta’ tnejn fil-mija, b’mod f’waqtu. Se nżommu r-rati tal-politika restrittivi biżżejjed għal kemm ikun meħtieġ sabiex tinkiseb din il-mira. Se nkomplu nsegwu approċċ dipendenti mid-data u fuq bażi ta’ laqgħa b’laqgħa sabiex niddeterminaw il-livell xieraq u t-tul taż-żmien tar-restrizzjoni. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospetti tal-inflazzjoni fid-dawl tad-data ekonomika u finanzjarja li ġejja, id-dinamika tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nintrabtu minn qabel dwar xi trajettorja partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa ninsabu lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.