KONFERENZA STAMPA

Christine Lagarde, President tal-BĊE,
Luis de Guindos, Viċi-President tal-BĊE

Frankfurt am Main, 24 ta’ Lulju 2025

Il-wara nofsinhar it-tajjeb, il-Viċi-President u jien nilqgħukom għal din il-konferenza stampa.

Il-Kunsill Governattiv illum iddeċieda li jżomm it-tliet rati ewlenin tal-imgħax tal-BĊE fl-istess livell. L-inflazzjoni bħalissa tinsab fil-mira tagħna fuq terminu medju ta’ tnejn fil-mija. L-informazzjoni li dieħla tappoġġa b’mod estensiv il-valutazzjoni preċedenti tagħna tal-prospettiva tal-inflazzjoni. Il-pressjonijiet fuq il-prezzijiet domestiċi komplew jittaffu, bil-pagi jogħlew b’mod iktar bil-mod. Tirrifletti parzjalment it-tnaqqis fir-rati tal-imgħax tal-passat tagħna, l-ekonomija, s’issa, uriet li b’mod ġenerali hija waħda b’saħħitha f’ambjent globali ta’ sfida. Fl-istess ħin, l-ambjent jibqa’ wieħed ta’ inċertezza straordinarja, b’mod speċjali minħabba tilwim kummerċjali.

Aħna ddeterminati niżguraw li l-inflazzjoni tistabbilizza fil-mira tagħna ta’ tnejn fil-mija fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni u r-riskji ta’ madwarha, fid-dawl tad-data ekonomika u finanzjarja li tidħol, kif ukoll id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

Fl-ewwel trimestru, l-ekonomija kibret b’mod aktar b’saħħtu milli mistenni. Dan kien parzjalment dovut għal ditti li għamlu frontloading ta’ esportazzjonijiet qabel żidiet qawwija f'daqqa fit-tariffi. Iżda t-tkabbir issaħħaħ ukoll b’konsum privat u b’investiment aktar b’saħħtu.

Stħarriġiet reċenti jippuntaw lejn espansjoni ġenerali modesta kemm fis-settur tal-manifattura kif ukoll fis-settur tas-servizzi. Fl-istess ħin, tariffi reali u mistennija ogħla, l-euro iktar b’saħħitha u inċertezza ġeopolitika persistenti qegħdin jagħmlu d-ditti aktar eżitanti biex jinvestu.

Is-suq tax-xogħol robust, introjtu reali li qed jiżdied u karti tal-bilanċ tas-settur privat solidi jibqgħu jappoġġaw il-konsum. Il-qgħad baqa’ fil-livell ta’ 6.3 fil-mija f’Mejju, qrib l-inqas livell tiegħu sa mill-introduzzjoni tal-euro. Kundizzjonijiet ta’ finanzjament aktar faċli qegħdin jixprunaw id-domanda domestika, inkluż fis-suq tal-akkomodazzjoni. Maż-żmien, investiment pubbliku ogħla fid-difiża u fl-infrastruttura għandu jappoġġa t-tkabbir ukoll.

Aktar minn qatt qabel, il-Kunsill Governattiv iqisha kruċjali li jsaħħaħ iż-żona tal-euro b’mod urġenti u l-ekonomija tagħha fl-ambjent ġeopolitiku preżenti. Il-politiki fiskali u strutturali għandhom jagħmlu l-ekonomija aktar produttiva, kompetittiva u reżiljenti. Il-gvernijiet għandhom jagħtu prijorità lil riformi strutturali li jsaħħu t-tkabbir u l-investiment strateġiku, filwaqt li jiżguraw finanzi pubbliċi sostenibbli. Huwa importanti li titlesta l-unjoni tat-tfaddil u tal-investimenti kif ukoll l-unjoni bankarja, wara skeda ċara u ambizzjuża, u li jiġi stabbilit malajr il-qafas leġiżlattiv għall-introduzzjoni potenzjali ta’ euro diġitali. Il-Kunsill Governattiv jilqa’ l-impenn tal-Eurogroup li jtejjeb l-effettività, il-kwalità u l-kompożizzjoni tal-infiq pubbliku u li jappoġġa l-isforzi mill-awtoritajiet Ewropej biex jippreservaw il-benefiċċji reċiproċi tal-kummerċ globali.

Inflazzjoni

L-inflazzjoni annwali kienet fil-livell ta’ 2.0 fil-mija f’Ġunju, minn 1.9 fil-mija f’Mejju. F’Ġunju, il-prezzijiet tal-enerġija żdiedu, iżda xorta għadhom inqas milli kienu sena ilu. L-inflazzjoni fil-prezzijiet tal-ikel ittaffiet xi ftit għal 3.1 fil-mija. F’Ġunju, l-inflazzjoni fil-prezzijiet tal-prodotti naqset xi ftit għal 0.5 fl-mija, filwaqt li l-inflazzjoni fil-prezzijiet tas-servizzi laħqet 3.3 fil-mija, minn 3.2 fil-mija f’Mejju.

Indikaturi ta’ inflazzjoni bażi huma konsistenti b’mod ġenerali mal-mira fuq perjodu ta’ żmien medju tagħna ta’ tnejn fil-mija. Il-kostijiet lavorattivi komplew jimmoderaw. Iż-żieda sena wara sena fil-kumpens għal kull impjegat naqset għal 3.8 fil-mija fl-ewwel trimestru, minn 4.1 fil-mija fit-trimestru ta’ qabel. Flimkien ma’ tkabbir fil-produttività b’saħħtu, din ikkontribwiet għal tkabbir aktar kajman fil-kostijiet lavorattivi unitarji. Indikazzjonijiet għall-ġejjieni, li jinkludu tracker tal-pagi u stħarriġiet tal-BĊE fuq l-aspettattivi tal-pagi minn ditti, konsumaturi u bassara professjonali, jindikaw tnaqqis ulterjuri fit-tkabbir fil-pagi.

L-istenniji fir-rigward tal-inflazzjoni fuq żmien qasir tal-konsumaturi naqsu kemm f’Mejju kif ukoll f’Ġunju, u dan irriversja ż-żieda osservata fix-xhur preċedenti. Il-biċċa l-kbira tal-miżuri tal-aspettattivi tal-inflazzjoni fuq żmien itwal se jkomplu jkunu ta’ madwar 2 fil-mija, u dan jappoġġa r-ritorn sostenibbli tal-inflazzjoni għall-mira tagħna.

Valutazzjoni tar-riskji

Ir-riskji għat-tkabbir ekonomiku jibqgħu mxaqilba lejn it-tnaqqis. Fost ir-riskji ewlenin hemm eskalazzjoni ulterjuri fit-tensjonijiet kummerċjali globali u inċertezzi assoċjali, li jistgħu jnaqqsu l-esportazzjonijiet u jnaqqsu l-investiment u l-konsum. Deterjorament tas-sentiment tas-suq finanzjarju jista’ jwassal għal kundizzjonijiet ta’ finanzjament aktar issikkati u aktar averżjoni għar-riskju, u jwassal biex l-impriżi u l-unitajiet domestiċi jkunu anqas disposti li jinvestu u jikkunsmaw. It-tensjonijiet ġeopolitiċi, bħall-gwerra mhux ġustifikata tar-Russja kontra l-Ukrajna u l-kunflitt traġiku fil-Lvant Nofsani, jibqgħu wkoll sorsi ewlenin ta’ inċertezza. B’kuntrast, jekk it-tensjonijiet fil-kummerċ u dawk ġeopolitiċi jissolvew malajr, dan jista’ jgħolli s-sentiment u jixpruna l-attività. Nefqa ogħla fuq id-difiża u l-infrastruttura, flimkien ma’ riformi li jtejbu l-produttività, għandhom iżidu t-tkabbir. Titjib fil-kunfidenza tan-negozju jistimula wkoll l-investiment privat.

Il-prospettiva għall-inflazzjoni hija aktar inċerta mis-soltu, bħala riżultat tal-ambjent volatili tal-politika tal-kummerċ globali. Euro aktar b’saħħtu jista’ jnaqqas l-inflazzjoni aktar milli mistenni. Barraminhekk, l-inflazzjoni tista’ tirriżulta li tkun aktar baxxa jekk tariffi ogħla jwasslu għal domanda aktar baxxa għal esportazzjonijiet taż-żona tal-euro u dan iwassal sabiex pajjiżi b’kapaċità żejda jbiddlu d-destinazzjoni tal-esportazzjonijiet tagħhom lejn iż-żona tal-euro. It-tensjonjiet fil-kummerċ jistgħu jwasslu għal volatilità akbar u averżjoni għar-riskju fis-swieq finanzjarji, u dan ikun ta’ piż fuq id-domanda domestika u b’hekk titnaqqas ukoll l-inflazzjoni. B’kuntrast, l-inflazzjoni tista’ tirriżulta ogħla jekk frammentazzjoni tal-ktajjen tal-provvista globali tgħolli l-prezzijiet tal-importazzjoni u żżid mal-limitazzjonijiet fil-kapaċità fl-ekonomija domestika. Żieda fin-nefqa fuq id-difiża u l-infrastruttura tista’ żżid ukoll l-inflazzjoni permezz tal-effett tagħha fuq perjodu ta’ żmien medju. L-eventi ta’ temp estrem, u l-kriżi klimatika li qiegħda tiżvolġi b’mod aktar estiż, jistgħu jgħollu l-prezzijiet tal-ikel aktar milli huwa mistenni.

Kundizzjonijiet finanzjarji u monetarji

Ir-rati tal-imgħax tas-suq żdiedu mill-aħħar laqgħa tagħna, speċjalment fuq maturitajiet itwal. Fl-istess ħin, it-tnaqqis tagħna fil-passat tar-rati tal-imgħax kompla jagħmel it-teħid ta’ self mill-kumpaniji inqas għali. Ir-rata tal-imgħax medja fuq is-self ġdid lid-ditti naqset xi ftit għal 3.7 fil-mija f’Mejju, minn 3.8 fil-mija f’April. Il-kost tad-dejn ibbażat fuq is-suq tal-ħruġ naqas ukoll, u f’Mejju niżel għal 3.6 fil-mija. Filwaqt li r-rata ta' tkabbir tas-self lil ditti mmoderat għal 2.5 fil-mija f’Mejju, il-ħruġ ta’ bonds korporattivi kien iktar b’saħħtu, u żdied b’rata ta’ 3.4 fil-mija f’termini annwali.

L-istandards tal-kreditu għas-self lin-negozji baqa’ fil-parti l-kbira mhux mibdul fit-tieni trimestru, kif ġie rrapportat fl-aħħar stħarriġ tagħna dwar is-self bankarju għaż-żona tal-euro. Filwaqt li t-tħassib tal-banek dwar ir-riskji ekonomiċi li jħabbtu wiċċhom magħhom il-klijenti tagħhom kellu impatt ta’ ssikkar fuq l-istandards tal-kreditu, dan kien kontrobilanċjat fil-parti l-kbira tiegħu minn kompetizzjoni aktar b’saħħitha fost min isellef. Fil-frattemp, id-domanda għall-kreditu min-naħa tad-ditti żdiedet xi ftit, fejn ibbenefikat minn rati tal-imgħax aktar baxxi, iżda d-ditti baqgħu kawti minħabba inċertezza globali u tensjonijiet kummerċjali.

Ir-rata medja tal-imgħax fuq self ipotekarju ġdid ftit li xejn inbidlet sa mill-bidu tas-sena u f’Mejju baqgħet 3.3 fil-mija. It-tkabbir fis-self ipotekarju tela’ għal 2.0 fil-mija f’Mejju, fil-kuntest ta’ żieda qawwija fid-domanda, filwaqt li l-istandards tal-kreditu ssikkaw xi ftit fit-tieni trimestru.

Konklużjoni

IIl-Kunsill Governattiv illum iddeċieda li jżomm it-tliet rati ewlenin tal-imgħax tal-BĊE fl-istess livell. Aħna ddeterminati niżguraw li l-inflazzjoni tistabbilizza fil-mira tagħna ta’ tnejn fil-mija fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. Id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni u r-riskji ta’ madwarha, fid-dawl tad-data ekonomika u finanzjarja li tidħol, kif ukoll id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.