KONFERENZA STAMPA

Christine Lagarde, President tal-BĊE,
Luis de Guindos, Viċi-President tal-BĊE

Frankfurt am Main, 17 ta’ April 2025

Il-wara nofsinhar it-tajjeb, il-Viċi-President u jien nilqgħukom għal din il-konferenza stampa.

Il-Kunsill Governattiv illum iddeċieda li jnaqqas it-tliet rati ewlenin tal-imgħax tal-BĊE b’25 punt bażi. B’mod partikolari, id-deċiżjoni li titnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – hija bbażata fuq il-valutazzjoni aġġornata tagħna tal-prospettiva tal-inflazzjoni, id-dinamika tal-inflazzjoni sottostanti u s-saħħa tat-trażmissjoni tal-politika monetarja.

L-inflazzjoni bħalissa tinsab f’madwar il-mira fuq terminu medju ta’ 2%. Fil-linja bażi tal-projezzjonijiet ġodda tal-persunal tal-Eurosistema, l-inflazzjoni globali hija stabbilita għal 2.0% fl-2025, 1.6% fl-2026 u 2.0% fl-2027. Ir-reviżjonijiet ’l isfel meta mqabbla mal-projezzjonijiet ta’ Marzu, b’0.3 punt perċentwali kemm għall-2025 u l-2026, jirriflettu prinċipalment preżunzjonijiet aktar baxxi għall-prezzijiet tal-enerġija u euro aktar b’saħħtu. Il-persunal qed jistenna li l-inflazzjoni, bl-esklużjoni tal-enerġija u l-ikel, se tilħaq medja ta’ 2.4% fl-2025 u 1.9% fl-2026 u fl-2027, li b’mod ġenerali ma nbidlux minn Marzu ’l hawn.

Il-persunal issa jbassar inflazzjoni medja ta’ 0.9 fil-mija fl-2025, 1.1 fil-mija fl-2026 u 1.3 fil-mija fl-2027. Il-projezzjoni tat-tkabbir mhux riveduta għall-2025 tirrifletti li l-ewwel trimestru se jkun aktar b’saħħtu milli mistenni flimkien ma’ prospetti aktar dgħajfin għall-kumplament tas-sena. Filwaqt li l-inċertezza dwar il-politiki ta’ kummerċ hija mistennija li tkun ta’ piż fuq l-investiment min-negozji u l-esportazzjonijiet, speċjalment fuq żmien qasir, iż-żieda tal-investiment mill-gvernijiet fuq difiża u infrastruttura se tappoġġa dejjem aktar it-tkabbir fuq żmien medju. L-introjtu reali ogħla u s-suq tax-xogħol b’saħħtu se jippermettu lill-unitajiet domestiċi biex jonfqu aktar. Flimkien ma’ kundizzjonijiet ta’ finanzjament aktar favorevoli, dan għandu jagħmel lill-ekonomija aktar reżiljenti għax-xokkijiet globali.

Fil-kuntest ta’ inċertezza qawwija, il-persunal evalwa wkoll uħud mill-mekkaniżmi li permezz tagħhom il-politiki tal-kummerċ differenti jistgħu jaffettwaw it-tkabbir u l-inflazzjoni taħt xi xenarji illustrattivi alternattivi. Dawn ix-xenarji se jiġu ppubblikati mal-projezzjonijiet tal-persunal fuq is-sit web tal-BĊE. Taħt din l-analiżi tax-xenarji, eskalazzjoni ulterjuri fit-tensjonijiet fil-kummerċ fix-xhur li ġejjin tista’ twassal biex it-tkabbir u l-inflazzjoni jkunu taħt il-projezzjonijiet tal-linja bażi. B’kuntrast ma’ dan, jekk it-tensjonjiet fil-kummerċ jissolvew b’eżitu pożittiv, it-tkabbir u, sa grad anqas, l-inflazzjoni jkunu ogħla milli fil-projezzjonijiet tal-linja bażi.

Il-biċċa l-kbira tal-miżuri tal-inflazzjoni sottostanti jissuġġerixxu li l-inflazzjoni se tistabbilizza ruħha għal madwar il-mira tagħna ta’ 2 fil-mija fuq perjodu ta’ żmien medju fuq bażi sostnuta. Iż-żieda fil-pagi għadha għolja imma tkompli timmodera b’mod viżibbli, u l-profitti qegħdin itaffu parzjalment l-impatt tagħha fuq l-inflazzjoni. Ittaffa t-tħassib li ż-żieda fl-inċertezza u r-reazzjoni volatili tas-swieq għat-tensjonijiet fil-kummerċ f’April jista’ jkollhom impatt ta’ ssikkar fuq il-kundizzjonijiet ta’ finanzjament.

Aħna ddeterminati li niżguraw li l-inflazzjoni tistabbilizza b’mod sostenibbli fil-mira tagħna ta’ tnejn fil-mija fuq perjodu ta’ żmien medju. B’mod speċjali fil-kundizzjonijiet attwali ta’ inċertezza eċċezzjonali, se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni fid-dawl tad-data ekonomika u finanzjarja li tidħol, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

L-ekonomija taż-żona tal-euro kibret b’0.3 fil-mija fl-ewwel trimestru tal-2025, skont l-istima preliminari tal-Eurostat. Il-qgħad, b’rata ta’ 6.2 fil-mija f’April, huwa fl-aktar livell baxx sa minn meta tnieda l-euro, u l-impjiegi żdiedu b’0.3 fil-mija fl-ewwel trimestru tas-sena, skont l-istima preliminari.

B’mod konformi mal-projezzjonijiet tal-persunal, id-data mill-istħarriġ tindika b’mod ġenerali xi prospetti aktar dgħajfin fiż-żmien fil-qrib. Filwaqt li l-manifattura ssaħħet, parzjalment minħabba li l-kummerċ tressaq ’il quddiem hekk kif huma antiċipati tariffi ogħla, is-settur tas-servizzi li huwa orjentat aktar domestikament qiegħed inaqqas fir-ritmu. It-tariffi ogħla u euro aktar b’saħħtu huma mistennija li jagħmluha aktar diffiċli għan-negozji biex jesportaw. Il-grad għoli ta’ inċertezza huwa mistenni li jkun ta’ piż fuq l-investiment.

Fl-istes ħin, bosta fatturi qegħdin iżommu lill-ekonomija reżiljenti u għandhom jappoġġaw it-tkabbir fuq żmien medju. Is-suq tax-xogħol b’saħħtu, l-introjti reali li qegħdin jiżdiedu, il-karti tal-bilanċ robusti tas-settur privat u l-kundizzjonijiet ta’ finanzjament eħfef, parzjalment minħabba t-tnaqqis fil-passat tar-rati tal-imgħax tagħna, għandhom jgħinu lill-konsumaturi u l-kumpaniji kollha jifilħu għall-konsegwenzi tal-ambjent globali volatili. Il-miżuri mħabbra reċentament biex jiżdied l-investiment fid-difiża u fl-infrastruttura għandhom isaħħu t-tkabbir ukoll.

Fl-ambjent ġeopolitiku preżenti, huwa saħansitra aktar urġenti li l-politiki fiskali u strutturali jagħmlu lill-ekonomija taż-żona tal-euro aktar produttiva, kompetittiva u reżiljenti. Il-Boxxla għall-Kompetittività tal-Kummissjoni Ewropea tipprovdi pjan direzzjonali konkret għall-azzjoni, u l-proposti tagħha, inkluż dwar is-simplifikazzjoni, għandhom jiġu adottati b’ħeffa. Dan jinkludi li titlesta l-unjoni tat-tfaddil u tal-investimenti, skont skeda ċara u ambizzjuża. Huwa importanti wkoll li jiġi stabbilit malajr il-qafas leġiżlattiv biex titwitta t-triq għall-introduzzjoni potenzjali tal-euro diġitali. Il-gvernijiet għandhom jiżguraw finanzi pubbliċi sostenibbli f’konformità mal-qafas ta’ governanza ekonomika tal-UE u għandhom jipprijoritizzaw ir-riformi strutturali essenzjali li jżidu t-tkabbir u l-investiment strateġiku.

Inflazzjoni

L-inflazzjoni annwali żdiedet għal 1.9 fil-mija f’Mejju, minn 2.2 fil-mija f’April, skont l-istima preliminari tal-Eurostat. L-inflazzjoni fil-prezzijiet tal-enerġija baqgħet -3.6 fil-mija. L-inflazzjoni fil-prezzijiet tal-ikel żdiedet għal 3.3 fil-mija, minn 3.0 fil-mija x-xahar ta’ qabel. L-inflazzjoni fil-prezzijiet tal-prodotti baqgħet l-istess b’rata ta’ 0.6 fl-mija, fil-waqt li l-inflazzjoni fil-prezzijiet tas-servizzi naqset għal 3.2 fil-mija, minn 4.0 fil-mija f’April. L-inflazzjoni fil-prezzijiet tas-servizzi kienet qabżet f’April l-aktar minħabba li l-prezzijiet għas-servizzi tal-ivvjaġġar madwar il-vaganzi tal-Għid għolew aktar milli mistenni.

Il-biċċa l-kbira tal-indikaturi tal-inflazzjoni sottostanti jissuġġerixxu li l-inflazzjoni se tistabbilixxi b’mod sostenibbli fil-mira tagħna fuq żmien medju ta’ tnejn fil-mija. L-ispejjeż tax-xogħol qegħdin jimmoderaw b’mod gradwali, kif huwa indikat mid-data li dieħla dwar pagi nnegozjati u data disponibbli mill-pajjiżi dwar il-kumpens għal kull impjegat. L-għodda ta’ monitoraġġ tal-pagi tal-BĊE tindika li t-tkabbir innegozjat fil-pagi fl-2025, filwaqt li l-projezzjonijiet tal-persunal jaraw li t-tkabbir fil-pagi se jaqa’ taħt it-3 fil-mija fl-2026 u l-2027. Filwaqt li l-prezzijiet tal-enerġija aktar baxxi u l-euro aktar b’saħħtu qegħdin ipoġġu pressjoni ’l isfel fuq l-inflazzjoni fuq żmien fil-qrib, l-inflazzjoni hija mistennija li tirritorna għall-mira fl-2027.

L-aspettattvi ta’ inflazzjoni tal-konsumatur fuq żmien qasir għolew kemxejn f’April, aktarx bħala riflessjoni tal-aħbarijiet dwar it-tensjonijiet fil-kummerċ. Iżda l-biċċa l-kbira tal-miżuri tal-aspettattivi tal-inflazzjoni fuq żmien itwal se jkomplu jkunu ta’ madwar 2 fil-mija, li jappoġġa r-ritorn sostenibbli tal-inflazzjoni għall-mira tagħna.

Valutazzjoni tar-riskji

Ir-riskji għat-tkabbir ekonomiku jibqgħu mxaqilba lejn it-tnaqqis. Eskalazzjoni ulterjuri fit-tensjonijiet fil-kummerċ globali u l-inċertezzi assoċjati aktarx li se jnaqqsu t-tkabbir taż-żona tal-euro billi jrażżnu l-esportazzjonijiet, u dan jista’ jnaqqas l-investiment u l-konsum. Deterjorament tas-sentiment tas-suq finanzjarju jista’ jwassal għal kundizzjonijiet ta’ finanzjament aktar issikkati u aktar averżjoni għar-riskju, u jwassal biex l-impriżi u l-unitajiet domestiċi jkunu anqas disposti li jinvestu u jikkunsmaw. It-tensjonijiet ġeopolitiċi, bħall-gwerra mhux ġustifikata tar-Russja kontra l-Ukrajna u l-kunflitt traġiku fil-Lvant Nofsani, jibqgħu wkoll sorsi ewlenin ta’ inċertezza. B’kuntrast, jekk it-tensjonijiet fil-kummerċ u dawk ġeopolitiċi jissolvew malajr, dan jista’ jgħolli s-sentiment u jixpruna l-attività. Żieda ulterjuri fl-infiq fuq id-difiża u l-infrastruttura, flimkien ma’ riformi li jtejbu l-produttività, ukoll għandhom iżidu t-tkabbir.

Il-prospettiva għall-inflazzjoni fiż-żona tal-euro hija aktar inċerta mis-soltu, bħala riżultat tal-ambjent volatili tal-politika tal-kummerċ globali. It-tnaqqis fil-prezzijiet tal-enerġija u l-euro aktar b'saħħtu jistgħu jimponu aktar pressjoni ’l isfel fuq l-inflazzjoni. Dan jissaħħaħ jekk it-tariffi ogħla jwasslu għal domanda aktar baxxa għal esportazzjonijiet taż-żona tal-euro u li l-pajjiżi b’kapaċità żejda jbiddlu d-destinazzjoni tal-esportazzjonijiet tagħhom lejn iż-żona tal-euro. It-tensjonjet fil-kummerċ jistgħu jwasslu għal volatilità akbar u averżjoni għar-riskju fis-swieq finanzjarji, li jkunu ta’ piż fuq id-domanda domestika u b’hekk inaqqsu wkoll l-inflazzjoni. B’kuntrast ma’ dan, il-frammentazzjoni tal-katini tal-provvista lokali tista’ tgħolli l-inflazzjoni billi timbotta ’l fuq il-prezzijiet tal-importazzjoni u żżid mar-restrizzjonijiet fil-kapaċità fl-ekonomija domestika. Żieda fin-nefqa fuq id-difiża u l-infrastruttura tista’ żżid ukoll l-inflazzjoni permezz tal-effett tagħha fuq perjodu ta’ żmien medju. L-avvenimenti ta’ temp estrem, u l-kriżi klimatika li qiegħda tiżvolġi b’mod aktar estiż, jistgħu jgħollu l-prezzijiet tal-ikel aktar milli huwa mistenni.

Kundizzjonijiet finanzjarji u monetarji

Ir-rati tal-imgħax bla riskju baqgħu ġeneralment l-istess sa mill-aħħar laqgħa tagħna. Il-prezzijiet tal-ishma għolew, u d-differenzjali fir-redditu tal-bonds tal-kumpaniji djiequ, b’risposta għal aħbarijiet aktar pożittivi dwar il-politiki tal-kummerċ globali u t-titjib fis-sentiment globali dwar ir-riskju.

It-tnaqqis tagħna fil-passat tar-rati tal-imgħax kompla jagħmel it-teħid ta’ self mill-kumpaniji inqas għali. Ir-rata tal-imgħax medja fuq is-self ġdid lid-ditti naqset xi ftit għal 3.8 fil-mija f’April, minn 3.9 fil-mija f’Marzu. Il-kost tal-ħruġ ta’ dejn ibbażat fuq is-suq baqa’ l-istess b’rata ta’ 3.7 fil-mija. It-tislif mill-banek lill-kumpaniji kompla jissaħħaħ gradwalment, u kiber b’rata annwali ta’ 2.6 fil-mija f’April u 2.4 fil-mija f’Marzu, filwaqt li l-ħruġ ta’ bonds minn kumpaniji kien imrażżan. Ir-rata tal-imgħax medja fuq self ipotekarju ġdid baqgħet 3.3 fil-mja f’April, filwaqt li t-tkabbir fit-tislif ipotekarju żdied għal 1.9 fil-mija.

F'konformità mal-istrateġija tal-politika monetarja tagħna, il-Kunsill Governattiv ivvaluta fil-fond ir-rabtiet bejn il-politika monetarja u l-istabbiltà finanzjarja. Filwaqt li l-banek taż-żona tal-euro baqgħu reżiljenti, ir-riskji aktar ġenerali għall-istabbiltà finanzjarja baqgħu għoljin, b’mod partikolari minħabba politiki tal-kummerċ globali ferm inċerti u volatili. Il-politika makroprudenzjali tibqa’ l-ewwel linja ta’ difiża kontra l-akkumulazzjoni ta’ vulnerabbiltajiet finanzjarji, u b’hekk ittejjeb ir-reżiljenza u tippreżerva l-ispazju makroprudenzjali.

Konklużjoni

Il-Kunsill Governattiv illum iddeċieda li jnaqqas it-tliet rati ewlenin tal-imgħax tal-BĊE b’25 punt bażi. B’mod partikolari, id-deċiżjoni li titnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – hija bbażata fuq il-valutazzjoni aġġornata tagħna tal-prospettiva tal-inflazzjoni, id-dinamika tal-inflazzjoni sottostanti u s-saħħa tat-trażmissjoni tal-politika monetarja. Aħna ddeterminati li niżguraw li l-inflazzjoni tistabbilizza b’mod sostenibbli fil-mira tagħna ta’ tnejn fil-mija fuq perjodu ta’ żmien medju. B’mod speċjali fil-kundizzjonijiet attwali ta’ inċertezza eċċezzjonali, se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni fid-dawl tad-data ekonomika u finanzjarja li tidħol, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa ninsabu lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.