Deċiżjonijiet tal-Kunsill Governattiv tal-BĊE (flimkien mad-deċiżjonijiet li jistabbilixxu r-rati tal-imgħax)

Diċembru 2025

19 ta’ Diċembru 2025

Komunikazzjoni esterna

Simplifikazzjoni tar-regoli bankarji tal-UE

Fil-11 ta’ Diċembru 2025, il-BĊE ppubblika tliet dokumenti fir-rigward tas-simplifikazzjoni tar-regoli bankarji tal-UE. L-ewwel nett, il-BĊE ppubblika rakkomandazzjonijiet għas-simplifikazzjoni tal-qafas regolatorju, superviżorju u ta’ rapportar prudenzjali Ewropew għall-banek. Dawn ir-rakkomandazzjonijiet tħejjew mit-Task Force ta’ Livell Għoli tal-Kunsill Governattiv dwar is-Simplifikazzjoni, approvati mill-Kunsill Governattiv tal-BĊE u se jiġu ppreżentati lill-Kummissjoni Ewropea. It-tieni, il-BĊE ppubblika rapport imħejji mis-Superviżjoni Bankarja tal-BĊE li jiddiskuti l-aġenda kontinwata tiegħu biex iżid l-effettività, l-effiċjenza u l-fokus tar-riskju tas-superviżjoni bankarja Ewropea skont il-leġiżlazzjoni eżistenti. Dawn l-inizjattivi jikkomplementaw ir-rakkomandazzjonijiet tat-Task Force ta’ Livell Għoli tal-Kunsill Governattiv u jistgħu jiġu implimentati bis-sħiħ indipendentement minn dawk ir-rakkomandazzjonijiet. It-tielet rapport, imħejji mill-Bord Ewropew dwar ir-Riskju Sistemiku, jikkompleta l-pakkett disponibbli fis-sit elettroniku tal-BĊE. Ġiet ippubblikata wkoll stqarrija għall-istampa relatata.

Infrastruttura tas-suq u pagamenti

Qafas legali aġġornat għall-kontinwazzjoni tal-ħidma esploratorja tal-Eurosistema dwar is-saldu fi flus tal-bank ċentrali ta’ tranżazzjonijiet bl-ingrossa ibbażati fuq teknoloġija ta’ reġistru distribwit (DLT, distributed ledger technology)

Fl-20 ta’ Novembru 2025, il-Kunsill Governattiv approva aġġornament tal-qafas legali għat-tkomplija tal-ħidma esploratorja tal-Eurosistema dwar is-saldu ta’ tranżazzjonijiet bl-ingrossa bbażati fuq id-DLT fi flus tal-bank ċentrali li għandu jibqa’ għaddej sat-tielet trimestru tal-2026, meta tiġi implimentata l-offerta inizjali tal-Eurosistema li tgħaqqad il-pjattaformi tad-DLT u s-Servizzi TARGET tas-suq biex jiġu saldati tali tranżazzjonijiet. Il-qafas legali jikkonsisti minn (a) Memorandum ta’ Qbil intern aġġornat tal-Eurosistema; u (b) deroga mmirata minn kriterji ta’ aċċess ta’ TARGET2-Titoli (T2S) magħżula skont il-Ftehim Qafas ta’ T2S li huwa wkoll temporanju, jiġifieri limitat għall-perjodu li matulu jibqa’ għaddej ix-xogħol esploratorju, li huwa mistenni li jdum sat-tielet trimestru tal-2026. Dan l-aġġornament isegwi l-approvazzjoni tal-Kunsill Governattiv tat-23 ta’ Ġunju 2025, ta’ pjan li se jagħmilha possibbli li jiġu saldati tranżazzjonijiet ibbażati fuq id-DLT bl-użu ta’ flus tal-bank ċentrali permezz ta’ programm fuq żewġ binarji. L-ewwel binarju, “Pontes”, jipprovdi offerta fuq terminu qasir lis-suq – skedata li titnieda fit-tielet trimestru tal-2026 – u t-tieni binarju, “Appia”, jiffoka fuq approċċ fit-tul.

Dokumentazzjoni legali aġġornata relatata mas-Sistema ta’ Ġestjoni tal-Kollateral tal-Eurosistema (ECMS)

Fil-21 ta’ Novembru 2025, il-Kunsill Governattiv approva aġġornament għall-Ftehim ta’ Livell 2/Livell 3 intern tal-Eurosistema għall-proġett ECMS. Dan l-aġġornament ġie skattat mid-dewmien fil-bidu tal-fażi operazzjonali tal-proġett ECMS, li beda jopera fis-16 ta’ Ġunju 2025.

Adeżjoni tal-Bank Nazzjonali Bulgaru għal ftehimiet relatati mal-infrastruttura tas-suq

Fl-4 ta’ Diċembru 2025, il-Kunsill Governattiv approva verżjonijiet emendati ta’ ftehimiet relatati mal-infrastruttura tas-suq fid-dawl tas-sħubija tal-Bulgarija fiż-żona tal-euro fl-1 ta’ Jannar 2026, sabiex il-Bank Nazzjonali Bulgaru jkun jista’ jsir parti għal dawn il-ftehimiet interni tal-Eurosistema li jiffurmaw il-qafas legali għas-Servizzi TARGET.

Kriterji ta’ eliġibbiltà għall-proġett Pontes u l-fażi pilota tiegħu

Fl-4 ta’ Diċembru 2025, il-Kunsill Governattiv approva l-każijiet ta’ użu u l-kriterji ta’ eliġibbiltà għall-parteċipanti, l-operaturi tad-DLT tas-suq u l-assi għal Pontes u l-fażi pilota tiegħu. L-offerta inizjali tiegħu hija prevista li tinħareġ sa tmiem it-tielet trimestru tal-2026. L-oqfsa operazzjonali u legali, li se jirfdu Pontes u l-fażi pilota tiegħu u li formalment jistabbilixxu dawn il-kriterji ta’ eliġibbiltà, se jiġu ppubblikati f’konformità mad-dati ta’ meta se jmorru live rispettivi tagħhom.

Rapport tal-2025 dwar il-frodi fil-pagamenti, imħejji b’mod konġunt mill-Awtorità Bankarja Ewropea (EBA) u l-BĊE

Fil-11 ta’ Diċembru 2025, il-Kunsill Governattiv awtorizza l-pubblikazzjoni tat-tieni rapport konġunt bejn l-EBA u l-BĊE dwar il-frodi fil-pagamenti. Ir-rapport jippreżenta ħarsa komprensiva ta’ data dwar frodi fil-pagamenti miġbura mill-EBA u mill-BĊE fir-rwoli rispettivi tagħhom bħala sorveljant tas-sistemi ta’ pagament, strumenti, skemi u arranġamenti u awtorità superviżorja ta’ fornituri ta’ servizz ta’ pagament, taħt l-oqfsa applikabbli relevanti. L-EBA u l-BĊE jimmonitorjaw l-iżviluppi fil-frodi tal-pagamenti abbażi tad-data dwar il-frodi miġbura u jippubblikaw dawn ir-rapporti fuq bażi annwali. Dawn ir-rapporti jissostitwixxu r-rapporti tal-Eurosistema preċedenti dwar frodi b’kards, u jipprovdu perspettiva aktar komprensiva u dettaljata dwar frodi fost strumenti tal-pagament varji. Ir-rapport konġunt tal-EBA-BĊE u stqarrija għall-istampa relatata huma disponibbli fuq is-siti web tal-EBA u tal-BĊE.

Parir dwar il-leġiżlazzjoni

Opinjoni tal-BĊE dwar il-prevenzjoni ta’ konflitti ta’ interess bejn il-persunal tas-Central Bank of Cyprus

Fil-25 ta’ Novembru 2025, il-Kunsill Governattiv adotta l-Opinjoni CON/2025/38 fuq talba tal-Bank Ċentrali ta’ Ċipru.

Opinjoni tal-BĊE dwar is-sjieda tar-riżervi tad-deheb tal-Banca d’Italia

Fit-2 ta’ Diċembru 2025, il-Kunsill Governattiv adotta l-Opinjoni CON/2025/39 fuq talba tal-Ministru Taljan għall-Ekonomija u l-Finanzi. Wara r-reviżjoni tad-dispożizzjoni rilevanti tal-abbozz tal-Liġi Baġitarja 2026 dwar is-sjieda tar-riżervi tad-deheb tal-Banca d’Italia, il-BĊE reġa’ ġie kkonsultat u fit-8 ta’ Diċembru 2025, il-Kunsill Governattiv adotta l-Opinjoni CON/2025/40 fuq talba tal-Ministru Taljan għall-Ekonomija u l-Finanzi.

Opinjoni tal-BĊE dwar it-tassazzjoni tal-istituzzjonijiet finanzjarji

Fit-12 ta’ Diċembru 2025, il-Kunsill Governattiv adotta l-Opinjoni CON/2025/41 fuq talba tal-Ministru għall-Ekonomija u l-Finanzi tal-Italja.

Opinjoni tal-BĊE dwar id-diġitalizzazzjoni u l-modernizzazzjoni tas-settur finanzjarju

Fis-16 ta’ Diċembru 2025, il-Kunsill Governattiv adotta l-Opinjoni CON/2025/42 fuq talba minn Banco de España, f’isem il-Ministeru Spanjol għall-Ekonomija, il-Kummerċ u n-Negozju.

Opinjoni tal-BĊE dwar ċerti dispożizzjonijiet dwar l-interazzjoni bejn il-liġi nazzjonali u l-Mekkaniżmu Superviżorju Uniku u regoli bankarji speċifiċi għas-settur

Fit-18 ta’ Diċembru 2025, il-Kunsill Governattiv adotta l-Opinjoni CON/2025/43 wara talba mill-Ministeru għall-Ekonomija u l-Finanzi tal-Italja. L-Opinjoni se tiġi ppubblikata fuq EUR-Lex meta jasal il-waqt.

Opinjoni tal-BĊE dwar il-proċedura ta’ notifika u valutazzjoni għal fużjonijiet intra-grupp

Fit-18 ta’ Diċembru 2025, il-Kunsill Governattiv adotta l-Opinjoni CON/2025/44 wara t-talba tal-Ministeru tal-Finanzi tal-Lussemburgu. L-Opinjoni se tiġi ppubblikata fuq EUR-Lex meta jasal il-waqt.

Governanza korporattiva

Emendi għall-qafas legali relatat mad-dħul tal-Bank Nazzjonali Bulgaru fl-Eurosistema

Fl-4 ta’ Diċembru 2025, il-Kunsill Governattiv adotta d-Deċiżjoni BĊE/2025/39 li temenda d-Deċiżjoni BĊE/2010/29 dwar il-ħruġ ta’ karti tal-flus tal-euro, biex tirrifletti l-bidla fil-kapaċità tal-Bank Nazzjonali Bulgaru minn bank ċentrali mhux taż-żona tal-euro għal bank ċentrali taż-żona tal-euro, bħala konsegwenza tat-tħassir, mill-1 ta’ Jannar 2026, tad-deroga tal-Bulgarija. Għall-istess raġuni, il-Kunsill Governattiv se jiġi mistieden f’Diċembru 2025 biex, l-ewwel, jadotta Deċiżjoni dwar il-ħlas tal-kapital, it-trasferiment ta’ assi ta’ riżervi barranin, u kontribuzzjonijiet mill-Bank Nazzjonali Bulgaru lir-riżervi u provvisti tal-BĊE, u t-tieni, biex japprova Ftehim bejn Българска народна банка (Bank Nazzjonali Bulgaru) u l-Bank Ċentrali Ewropew dwar il-pretensjoni kkreditata lil Българска народна банка (Bank Nazzjonali Bulgaru) mill-Bank Ċentrali Ewropew taħt l-Artikolu 30.3 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew.

Fis-16 ta’ Diċembru 2025, il-Kunsill Ġenerali approva wkoll Ftehim emendat li jemenda l-Ftehim tal-Bank Ċentrali ERM II fid-dawl tat-tħassir, mill-1 ta’ Jannar 2026, tad-deroga tal-Bulgarija.

L-adozzjoni u l-approvazzjoni (kif applikabbli) ta’ dawn l-atti legali hija proċedura standard li ssir fid-dawl tad-dħul fl-Eurosistema tal-bank ċentrali nazzjonali ta’ Stat Membru li jadotta l-euro. Din hija akkumpanjata mill-aġġornament imsemmi hawn fuq tal-iskeda tas-sistema ta’ rotazzjoni tad-drittijiet tal-vot fil-Kunsill Governattiv bħala riżultat tal-fatt li l-Bank Nazzjonali Bulgaru ssieħeb fl-Eurosistema u qed jieħu sehem fit-teħid tad-deċiżjonijiet tagħha. Il-kalendarju aġġornat se jkun disponibbli fuq is-sit web tal-BĊE fl-1 ta’ Jannar 2026.

Rakkomandazzjoni tal-BĊE dwar l-awdituri esterni ta’ Eesti Pank

Fit-12 ta’ Diċembru 2025, il-Kunsill Governattiv adotta r-Rakkomandazzjoni BĊE/2025/41 lill-Kunsill tal-Unjoni Ewropea dwar l-awdituri esterni tal-Eesti Pank. Ir-Rakkomandazzjoni se tiġi ppubblikata fuq EUR-LEX meta jasal il-waqt.

Estensjoni proposta tal-mandat tal-Viċi President tal-Bord Superviżorju

Fis-17 ta’ Diċembru 2025, il-Kunsill Governattiv ippropona li jestendi l-mandat tal-membru tal-Bord Eżekuttiv tal-BĊE, Frank Elderson, bħala Viċi President tal-Bord Superviżorju tal-BĊE. Skont ir-Regoli ta’ Proċedura tal-BĊE, il-mandat tal-Viċi President jista’ jiġi estiż, iżda mhux lil hinn minn tmiem il-mandat ta’ 8 snin bħala membru tal-Bord Eżekuttiv. Il-mandat tas-Sur Elderson jintemm fl-14 ta’ Diċembru 2028. Tagħrif iżjed dettaljat huwa disponibbli fi stqarrija għall-istampa relatata fis-sit web tal-BĊE.

Ħatra tal-President tal-Kumitat dwar il-Kontrollar (COMCO) u tal-ko-President tal-bank ċentrali nazzjonali tal-Kumitat tal-Iżvilupp Organizzazzjonali (ODC, Organisational Development Committee)

Fis-17 ta' Diċembru 2025, il-Kunsill Governattiv ħatar lil Sergio Nicoletti Altimari, Membru tal-Bord Governattiv u Deputat Gvernatur tal-Banca d'Italia, bħala President tal-COMCO, biex jieħu post Olaf Sleijpen, President tad-De Nederlandsche Bank, li l-mandat tiegħu bħala president tal-COMCO jiskadi fi tmiem l-2025. Il-Kunsill Governattiv ħatar ukoll lil Elisa Newby, Kap tas-Segretarjat Ġenerali tas-Suomen Pankki – Finlands Bank, bħala ko-President tal-ODC tal-bank ċentrali nazzjonali, biex tieħu post Michael Peschel li se jirtira mid-Deutsche Bundesbank fi tmiem is-sena. Iż-żewġ ħatriet jidħlu fis-seħħ fl-1 ta' Jannar 2026 u jibqgħu fis-seħħ sal-31 ta' Diċembru 2028 biex jikkoinċidu mal-mandati tal-Presidenti l-oħrajn tal-kumitati tal-Eurosistema/SEBĊ li nħatru mill-ġdid reċentement għall-perjodu ta' tliet snin minn Jannar 2026 sa Diċembru 2028.

Kooperazzjoni internazzjonali u Ewropea

Programm ta’ kooperazzjoni tas-Sistema Ewropea ta’ Banek Ċentrali (SEBĊ) għat-tisħiħ tal-kapaċitajiet tal-banek ċentrali fil-Balkani tal-Punent

Fis-27 ta’ Novembru 2025, il-Kunsill Governattiv approva d-dokumentazzjoni tal-programm għat-tielet fażi tal-programm ta’ kooperazzjoni tas-SEBĊ bejn is-SEBĊ u l-Balkani tal-Punent. Dan il-programm, ikkoordinat mid-Deutsche Bundesbank u ffinanzjat mill-Kummissjoni Ewropea taħt il-Qafas ta’ Programmazzjoni tal-Istrument għall-Assistenza ta’ Qabel l-Adeżjoni (IPA III) tagħha għall-perjodu 2021-27, jinvolvi 21 bank ċentrali nazzjonali tas-SEBĊ u se jkun ta’ benefiċċju għall-Bank tal-Albanija, għall-Bank Ċentrali tal-Bożnija-Ħerzegovina, għall-Bank Nazzjonali tar-Repubblika tal-Maċedonja ta’ Fuq, għall-Bank Ċentrali tal-Montenegro, għall-Bank Nazzjonali tas-Serbja u għall-Bank Ċentrali tar-Repubblika tal-Kosovo^*. Għall-Bożnija-Ħerzegovina, se jkunu inklużi wkoll iż-żewġ aġenziji superviżorji (l-Aġenzija Bankarja Federali tal-Federazzjoni tal-Bożnija-Ħerzegovina u l-Aġenzija Bankarja tar-Repubblika Srpska). Din it-tielet fażi tal-programm se tiġi implimentata fuq tliet snin, li jibdew fl-2026.

^*Din id-deżinjazzjoni hija mingħajr preġudizzju għall-pożizzjonijiet dwar l-istatus u hija konformi mar-Riżoluzzjoni tal-Kunsill tas-Sigurtà tan-NU 1244/1999 u l-Qorti Internazzjonali tal-Opinjoni tal-Ġustizzja dwar id-dikjarazzjoni tal-indipendenza tal-Kosovo.

Programm ta’ kooperazzjoni tas-SEBĊ ma’ banek ċentrali Afrikani biex jissaħħu l-istabbiltà, ir-reżiljenza u l-governanza finanzjarji

Fit-3 ta’ Diċembru 2025, il-Kunsill Governattiv approva d-dokumentazzjoni tal-programm għal estensjoni ta’ sentejn tal-programm ta’ kooperazzjoni tas-SEBĊ mal-banek ċentrali Afrikani biex jissaħħu r-reżiljenza u l-governanza tal-istabbiltà finanzjarja. Dan il-programm, ikkoordinat mid-Deutsche Bundesbank u ffinanzjat mill-Kummissjoni Ewropea taħt l-Istrument tagħha ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali, jinvolvi disa’ banek ċentrali nazzjonali tas-SEBĊ u se jkun ta’ benefiċċju għal 12-il bank ċentrali (il-Bank Nazzjonali tal-Angola, il-Bank Ċentrali tal-Istati tal-Afrika tal-Punent (BCEAO), il-Bank tal-Istati tal-Afrika Ċentrali (BEAC), il-Bank Ċentrali tal-Eġittu, il-Bank tal-Ghana, il-Bank Ċentrali tal-Kenja, il-Bank Al-Maghrib (il-Bank Ċentrali tal-Marokk), il-Bank tal-Mozambique, il-Bank tan-Namibja, il-Bank tar-Riżerva tal-Afrika t’Isfel, il-Bank tat-Tanzanija u l-Bank tat-Tuneżija) li jaqdu total ta’ 24 pajjiż.

Superviżjoni Bankarja tal-BĊE

Mistoqsijiet komuni (FAQs) dwar l-applikazzjoni tal-governanza ambjentali, soċjali u ambjentali (ESG)

Fl-20 ta’ Novembru 2025, il-Kunsill Governattiv ma oġġezzjonax għal proposta mill-Bord Superviżorju biex jippubblika sett ta’ FAQs dwar l-applikazzjoni tar-rekwiżiti ta’ divulgazzjoni tal-ESG wara l-ħruġ ta’ Opinjoni tal-EBA fil-forma ta’ ittra ta’ ebda azzjoni (ara EBA/Op/2025/11). L-FAQs għandhom l-għan li jindirizzaw mistoqsijiet minn istituzzjonijiet taħt superviżjoni u minn awtoritajiet nazzjonali kompetenti dwar il-pożizzjoni tal-BĊE dwar l-ittra ta’ ebda azzjoni tal-EBA dwar ir-rekwiżiti ta’ divulgazzjoni tal-ESG tal-Pilastru 3 u jiċċaraw li l-BĊE se jsegwi r-rakkomandazzjonijiet tal-EBA. L-FAQs huma disponibbli fis-sit web tas-superviżjoni bankarja tal-BĊE.

Pubblikazzjoni tal-Gwida għall-Implimentazzjoni tal-MSU TIBER-UE

Fl-20 ta’ Novembru 2025, il-Kunsill Governattiv ma oġġezzjonax għal proposta tal-Bord Superviżorju biex tiġi ppubblikata l-Gwida ta’ Implimentazzjoni tal-MSU TIBER-EU, li tadotta u timplimenta l-Qafas Ewropew għall-ħolqien ta’ Tim Aħmar Etiku Bbażat fuq l-Intelligence dwar it-Theddid (TIBER-EU) għall-ittestjar obbligatorju tal-penetrazzjoni xprunat mit-theddid ta’ istituzzjonijiet sinifikanti skont l-Att dwar ir-Reżiljenza Operazzjonali Diġitali. Il-Gwida dwar l-Implimentazzjoni hija disponibbli fis-sit web tas-superviżjoni bankarja tal-BĊE.

Programm ta’ Eżami Superviżorju għal spezzjonijiet fuq il-post u investigazzjonijiet ta’ mudelli interni fl-2026

Fil-21 ta’ Novembru 2025, il-Kunsill Governattiv ma oġġezzjonax għal proposta tal-Bord Superviżorju li jaġġorna l-Programm ta’ Eżami Superviżorju 2026 għal spezzjonijiet fuq il-post u investigazzjonijiet ta’ mudelli interni f’istituzzjonijiet sinifikanti fi ħdan is-superviżjoni bankarja Ewropea. Il-Programm ta’ Eżami Superviżorju fuq il-post huwa bbażat fuq il-prijoritajiet superviżorji għall-2026-28, li ġew ippubblikati fuq is-sit web tas-superviżjoni bankarja tal-BĊE f’Novembru 2025.

Rieżami tal-kwalità tal-assi ta’ Raiffeisen-Holding Niederösterreich-Wien

Fil-25 ta’ Novembru 2025, il-Kunsill Governattiv ma oġġezzjonax għal proposta mill-Bord Superviżorju biex jiġu żvelati r-riżultati finali tar-rieżami tal-kwalità tal-assi għal Raiffeisen-Holding Niederösterreich-Wien. Ir-riżultati u stqarrija għall-istampa relatata huma disponibbli fuq is-sit web tas-superviżjoni bankarja tal-BĊE.

Pubblikazzjoni tal-Linja Gwida tal-BĊE dwar skoperturi ta’ self improduttiv ta’ istituzzjonijiet inqas sinifikanti

Fl-10 ta’ Diċembru 2025, il-Kunsill Governattiv ma oġġezzjonax għal proposta mill-Bord Superviżorju biex tiġi adottata l-Linja Gwida BĊE/2025/40 dwar l-approċċ superviżorju mill-awtoritajiet nazzjonali kompetenti għall-kopertura ta’ skoperturi mhux produttivi miżmuma minn entitajiet inqas sinifikanti taħt superviżjoni. Dan isegwi konsultazzjoni pubblika dwar l-abbozz inizjali. Il-Linja Gwida, flimkien ma’ stqarrija għall-istampa u dikjarazzjoni ta’ feedback imħejjija bi tweġiba għall-kummenti riċevuti bħala parti mill-konsultazzjoni pubblika, hija disponibbli fuq is-sit web tas-superviżjoni bankarja tal-BĊE.

Test tal-istress fuq ir-riskju ġeopolitiku

Fit-12 ta’ Diċembru 2025, il-BĊE ħabbar li se jwettaq test tal-istress fid-direzzjoni opposta tar-riskju ġeopolitiku fl-2026 fuq il-110 banek taħt is-superviżjoni diretta tiegħu. Dan it-test tal-istress invers se jikkomplementa t-test tal-istress tal-EBA tal-2025, li assuma xenarju komuni għall-banek kollha u wassal għal differenzi fit-tnaqqis tal-kapital tagħhom. It-test tal-istress tematiku tal-2026 se jitlob lill-banek jivvalutaw kif ir-riskju ġeopolitiku jista’ jaffettwa l-mudell tan-negozju tagħhom. Tagħrif iżjed dettaljat huwa disponibbli fi stqarrija għall-istampa relatata fis-sit web tal-BĊE.

Gwida aġġornata tal-BĊE dwar in-notifika ta’ trasferiment ta’ riskju sinifikanti u appoġġ impliċitu għat-titolizzazzjonijiet

Fil-15 ta’ Diċembru 2025, il-Kunsill Governattiv ma oġġezzjonax għal proposta mill-Bord Superviżorju biex tiġi ppubblikata gwida aġġornata tal-BĊE għal istituzzjonijiet sinifikanti dwar in-notifika ta’ trasferiment ta’ riskju sinifikanti u appoġġ impliċitu għat-titolizzazzjonijiet. Il-gwida tistabbilixxi l-proċess ta’ notifika li l-istituzzjonijiet sinifikanti li jaġixxu bħala istituzzjonijiet oriġinaturi ta’ tranżazzjonijiet ta’ titolizzazzjoni huma rrakkomandati li jsegwu fir-rigward tar-rikonoxximent ta’ trasferiment ta’ riskju sinifikanti għal titolizzazzjoni partikolari. Il-gwida, flimkien mal-istqarrija għall-istampa relatata, hija disponibbli fuq is-sit web tas-superviżjoni bankarja tal-BĊE.